Bizkaiko Foru Aldundiak Kanpaina hau jarri du abian aurtengo udako jaiak “berdintzaileak, alaiak, errespetuzkoak eta dibertigarriak” izan daitezen
05Uztailak Bizkaiko Foru Aldundiak jai- eta aisialdi-inguruneetako sexu-erasoen aurkako kanpaina bat abiarazi du udako hilabeteetarako.
Kanpainaren leloa honako hau da: "Vigilantes de la jaia. Honelako jaietarako aliatuen bila gabiltza: berdintasunezkoak, libreak, alaiak, errespetuzkoak eta dibertigarriak". Gaur goizean aurkeztu du flashmob baten bidez, Guggenheim Museoaren ondoan, Teresa Laespada ahaldun nagusiorde eta Enplegua, Gizarte Kohesio eta Berdintasuna sustatzeko foru diputatuak. Bertan, dozenaka lagunek "Respect" abestia dantzatu dute, Big Band baten musikarekin batera.
Laespada foru diputatuak adierazi du uda jai garaia dela, elkarrekin izateko eta alaitasunez gozatzeko garaia, baina adierazi du ere gizonezkoek eta emakumezkoek ez dutela ikuspegi berbera.
Bizkaiko Foru Aldundiak dei egiten dio gizarte osoari, batez ere mutil gazteei, jai libre, alai, errespetuzko eta dibertigarriak eraikitzeko, gaineratu du.
Ildo horretan, gizonezkoak indarkeriazko eta jazarpeneko jarreren aurkako gaitzespenean aliatuak izatera gonbidatu ditu, sexu-erasoen aurreko gaitzespen-adierazpenekin bat etorriz, beste mutil batzuei erakusteko indarkeriaz dibertsiorik ez dagoela.
Hondartzako erreskate-torpedo bat simulatzen duen 3D pieza bat duen ibilgailu bat gure lurralde historikoko hondartza, jai eta kontzertuetan ibiliko da uda honetan. Gainera, une horietan kanpainaren informazio-materiala banatuko da.
ERREGISTRATUTAKO SEXU-ERASOAK % 45 IGO DIRA BI URTEAN
Bizkaiko Indarkeria Matxistaren Behatokiak matxismoaren ondorioz emakumeek Bizkaian jasaten duten indarkeriaren errealitateari buruzko informazioa jasotzen du. Informazio horretan, Eusko Jaurlaritzako Segurtasun Sailak sexu-askatasunaren aurkako biktimizazioei buruz ematen dituen zifren berri ematen da.
Ildo horretan, 2023an sexu-askatasunaren aurkako 325 biktimizazio zenbatu ziren Bizkaian, hau da, % 18,61 gehiago 2022an baino. 2022an % 22,32 igo ziren aurreko urtearekin alderatuta.
Bestela esanda, bi urtean, 2021etik 2023ra bitartean, Bizkaian zenbatutako sexu-askatasunaren aurkako biktimizazioak 224tik 325era igaro ziren, hau da, % 45,08ko igoera izan da. Testuinguruan jartzearren, gainerako biktimizazioak (bikotekidea eta bikotekide ohia + familia barrukoa) % 18,62 igo ziren aldi horretan bertan; beraz, Bizkaian azken bi urteetan zenbatutako sexu-askatasunaren aurkako biktimizazioen igoerak gainerako biktimizazioek izandako igoera bikoiztu du.
2023ko datu horiek erakusten duten beste errealitate batzuk dira sexu-askatasunaren aurkako biktimizazioen % 64,61 ostiralean, larunbatean edo igandean gertatzen direla, edo ia hirutik bat gaueko hamarrak eta goizaldeko ordu biak bitartean gertatzen dela ( % 30,15).
Inplikatutako pertsonen adinari dagokionez, erasotzaile gehienak 30 eta 49 urte bitartekoak dira (erasotzaile guztien % 42,85 2023an), baina biktima gehienek 21 urte baino gutxiago dituzte (biktima guztien % 55,93 2023an).
Biktimen eta erasotzaileen adina zehatzago aztertuz gero, nabarmentzekoa da, halaber, adingabeak izan zirela biktimen % 42,81, eta erasotzaileen % 12,08.
