Bizkaiak Omako Basoaren migrazioa burutu eta jendeari ireki dio Agustín Ibarrolaren obra

Arte garaikidean eta baso-artean adituak diren pertsonen talde baten babesarekin lortu da Ibarrolaren basoa kokapen berrira lekualdatzea. Ahalegin horren emaitza: Omako Baso bat jasangarriagoa, osoagoa eta Agustín Ibarrolaren jatorrizko ideiarekin leialagoa. Gainera, basoa handiagotu egin da, eta aurretik galduta zeuden multzo batzuk berreskuratu dira. Bisita-programa era jasangarrian kudeatzeko kezkari erantzuteko, Bizkaiko Foru Aldundiak aurretiko erreserba ezarri du, bai eta doako anezka-bus zerbitzu bat ere, asteburu eta jaiegunetan, Gernika-Lumotik Santimamiñeko aparkalekuraino. Zerbitzu hori azarotik aurrera eskainiko da. Omako Basoa bisitatzeko, ezinbestekoa da aurrez erreserba egitea bizkaia.eus/eu/omako-basoa webgunean, bisita libreak zein gidatuak egiteko.

Bizkaiko Ahaldun Nagusi Elixabete Etxanobe buru, Omako Basoa inauguratzeko ekitaldia egin da, bertan zirela Agustín Ibarrolaren senideak eta basoa lekualdatzeko proiektua gauzatu duen taldea, bai eta Leixuri Arrizabalaga ere, Euskara, Kultura eta Kiroleko diputatua.

Omako basoa, Arte eta Naturaren korrontean kokatzen den paregabeko artelana, berriro ere ikusgai dago jendearentzat.

Ahaldun Nagusiak azpimarra jarri du Agustín Ibarrolaren obra migratzeko prozesuan, eta adierazi du Omako Basoak bere esentzia berreskuratu duela artelan gisa. Artelan bat non berriro elkartzen baitira Agustín Ibarrolaren obra eta bisitariak. Etxanobek nabarmendu du Arte eta Naturako lan hori kokapen berri batera migratzeko prozesuak obraren kontzeptua eta espiritua mantendu dituela eta orain bisitariei tresna gehiago ematen zaizkiela obra hobeto ulertzeko eta gozatzeko.

Elixabete Etxanobek azpimarratu du basoak lotura bat sinbolizatzen duela kultura garaikidearen eta Bizkaiko milaka urteko kulturaren artean. «Hori da Oma, eta hori da, orobat, Bizkaia», esan du.

Etxanoberen esanetan, Omako Basoa bidezidor eroso eta irisgarriagoekin egokitu da, eta, horri esker, bisitariek esperientzia aberasgarriagoa eta ordenatuagoa izan ahalko dute obra hobeto ulertzeko. Gainera, basoa era jasangarrian kudeatzeko neurriak hartu dira, eta hala ziurtatuko da obra bera eta inguruko natura

Obraren, tokiaren eta ingurunearen jasangarritasuna bermatzeko, Omako Basoa bisitatu nahi dutenek aurrez erreserbatu behar dute bizkaia.eus/eu/omako-basoa webgunean, bisita libreak zein gidatuak egiteko. Erreserbatutako bisita baino ordubete lehenago, sarrera baliozkotu beharko da Santimamiñeko arreta-gunean, zeren eta Santimamiñetik Omako Basoraino doan 2,8 kilometro inguruko ibilaldiak 50 bat minutu irauten baitu.

Bisita gidatuak larunbatetan bakarrik eskainiko dira, 11:00etan gaztelaniaz eta 12:30ean euskaraz. Bisita gidatuen tarifa orokorra 10 eurokoa da, eta ordubeteko iraupena izango dute. Salbuespen gisa, bisita gidatuak eskainiko dira orobat azaroaren 1ean, abenduaren 6, 7, 8, 9 eta 10ean, martxoaren 28, 29, 30, 31n eta apirilaren 1ean, Aste Santuan, eta maiatzaren 1ean.

Gainera, Santimamiñeko aparkalekuan aparkatzeko mugak direla eta,  azarotik aurrera, doako anezka-bus zerbitzua doan erabili ahal izango da asteburuetan.  Anezka Gernika-Lumoko bus-geltokitik abiatuko da orduro (9:00etatik 13:00etara) eta Santimamiñeko aparkalekuraino iritsiko da, bidea 20 minutukoa izango da. Zerbitzu hau azaroaren 1ean egongo da eskuragarri eta asteburu guztietan data horretatik aurrera.

Horrela, Bizkaiko Foru Aldundiak Santimamiñera garraio publikoan eramatea ahalbidetu nahi du, lehendik ez baitzegoen aukerarik.

Bisitarekin lotutako edozein kontsulta oma@bizkaia.eus helbidean egin daiteke, edo 94 465 16 57 telefono zenbakira deituz.

Baso migratzailea

Omako Basoa kokapen berrira lekualdatzea gorabehera handiko proiektua izan da, eta arte garaikidean eta baso-artean adituak diren pertsonen talde baten babesarekin gauzatu da.

Ahalegin horren emaitza: Omako Baso bat osoagoa eta Agustín Ibarrolaren jatorrizko ideiarekin leialagoa. Gainera, basoa handiagotu egin da, eta aurretik galduta zeuden multzo batzuk berreskuratu dira.

Diziplina anitzeko proiektu horretan aritutako lantaldeak UPV/EHUko irakasle Fernando Bazeta izan du buru, eta hainbat arlotako kidez osatutako talde batekin elkarlanean jardun du: artista plastikoak, jatetxe-arloko profesional adituak, Euskal Arte Garaikideko espezialistak, arkitektoak, basogintzako adituak. Halaber, Bizkaiko Foru Aldundiko Kultura Ondarearen Zerbitzuaren aholkularitza izan du.

Basoak izango duen kudeaketa diseinatzeko orduan, funtsezko hiru premisaren azpian jarduteko ahalegin berezia egin da:

• Lehenik, obra errespetatzea, arbolentzako defentsa naturalak sortuz, eta basoa kontserbatu eta mantentzeko plan berriak artikulatzea; Baso Zerbitzuak eta Basalan foru-erakundeak dihardute lan horretan, eta hasiera-hasieratik egon dira inplikatuta proiektuan.

• Bigarrenik, bisitariak protagonista egitea; horretarako, orain tresna gehiago eta hobeak eskainiko zaizkie Agustín Ibarrolaren obra behar bezala ulertu eta gozatzeko: web berri bat lau hizkuntzatan eta mapa bat, basoan zehar gidatuko dituena. Horiei, app bat gehituko zaie abenduan, aukera emango diena basoari bisita aberasgarriagoa eta osoagoa egiteko. Gainera, bidezidor erosoagoak eta irisgarriagoak prestatu dira; basoak zabaleran irabazi du (orain 12 hektarea ditu) eta multzoen berrirakurketa egin da, horiek errazago ulertzeko.

• Hirugarrenik, jasangarritasuna funtsezko beste elementu bat izan da basoak izango duen kudeaketa diseinatzeko orduan. Jasangarritasuna kontuan harturik erabili dira basoaren berezko materialak, markatu dira bidezidorrak eta ezarri dira arbolentzako segurtasun-perimetroak. Jasangarritasuna kontuan harturik aplikatu da pintura berria eta gestionatu dira bisitak, non aurretiko hitzorduen zerbitzua ezarriko baita, bisita-fluxua hobeto banatzeko. Gainera, asteburuetan eta jaiegunetan, doako anezka bat ezarriko da Gernika-Lumotik, toki hau garraio publikoan bisitatu ahal izan dadin, eta zonako aparkalekuetan auto metaketa arintzeko.

Langintza horretan guztian, bereziki garrantzitsua izan da Bizkaiko Foru Aldundiak abian jarritako entzute- eta lankidetza-prozesua. Hala, bilerak eta bisita esperimentalak egin dira hainbat interesdunekin: udal-erakundea eta udalerriko ostalaritza, Bizkaiko bulego eta eragile turistikoak, Landa Garapenerako Agentzia, Urdaibaiko Erreserbaren Patronatua, Bizkaiko Adinekoen Kontseilua eta zenbait kolektibo biltzen dituzten elkarteak. Haien proposamen eta gomendio asko dagoeneko sartu dira eskaintzan, eta beste batzuk gradualki inplementatuko dira.

Proiektuak lekukotza ematen du Bizkaiko Foru Aldundiak artea eta natura zaintzeko hartu duen konpromisoaz, eta mugarria da Euskal Herriko arte garaikidearen historian.

ITURRIA: Bizkaiko Foru Aldundia