Erregistratu den osoko zuzenketan, jeltzaleek adierazi dute lege-proiektuak “Estatuaren eskumen-tituluak urratzen dituela” “autonomia-erkidegoak harmonizatzeko, baldintzatzeko, zuzentzeko eta kontrolatzeko”, eta “autonomia-erkidegoak estatu-politiken betearazle soil” bihurtzen dituela, berezko politikarik finkatu gabe
24Apirilak Kongresuko Euskal Taldeak osoko zuzenketa erregistratu du gaur arratsaldean, Familien Lege Proiektua Espainiako Gobernuari itzultzea planteatuz. Eta sei orrialdeko idatzi baten bidez egin du, non ziurtatzen duen Ione Belarra ministroaren legegintza-proposamenak Konstituzioan eta Autonomia Estatutuetan eskumenak banatzeko jasota dagoen ordena desegitea dakarrela.
Hala, EAJ-PNVk adierazi du Lege Proiektuaren ageriko helburua legegintza-funtzioak baldintzatzea, zuzentzea eta kontrolatzea dela, eta, batez ere, Estatuak eskumenik ez duen eginkizun betearazleak. Esate baterako, familiaren babesari, hezkuntzari, osasunari, informazioaren teknologiei edo etxebizitzari buruzko politikak. Are gehiago, Euskal Taldeak adierazi du arau-testuan aurreikusitako neurriak zeharkakoak direla erabat, eta nabarmen gainditzen dutela EB 2019/1158 Zuzentaraua (familia eta lana bateragarri egiteari buruzkoa).
Euskal Taldeak testu honetan baieztatzen duenez, lege-proiektuak Estatuak erabili dituen eskumen-tituluak bereizten ditu. Eta gogorarazten du Estatuaren eskumeneko agindu bakarrak lan-erregulazioari buruzkoak direla, zalantzarik gabe.
Horrela, eta zehazki, Euskal Taldeak esan du lege-proiektuak jarraibide batzuk ematen dituela, eta eskumena duten autonomia-erkidegoei jarduteko modu zehatza ezartzen diela. Horrek esan nahi du haien eskumen esklusiboak betearazpen-eskumen huts edo osagarri bihurtzen direla, eta haien autonomia politikoa gauzatzea eragozten zaiela, konstituzionaltasun-blokean aurreikusten den bezala. Besteen artean adibide “paradigmatiko” gisa aipatu du 7. Xedapen Gehigarria “Autonomia Erkidegoei agintzen diena 24 hilabeteko epean legeak ezartzen dituen derrigorrak betetzea, derrigor horiek autonomiaren eskumen esklusibokoak izan arren”.
EAJ-PNVk, beraz, Lege Proiektu honetan ere, “Estatuaren aldetik gero eta gehiago errepikatzen den joera” ikusi du, “eskumen autonomiko esklusiboa duten gaiak murrizten dituena”. Joera hori gauzatzeko, Espainiako Konstituzioaren 149.1.1. artikuluaren gehiegizko erabilera antzeman da, konstituzio-jurisprudentziak eman dion irismena gainditzen duena, eskumen autonomikoak harmonizatzeko, eskumen horiek “baldintzatuz”. “Autonomia-erkidegoen arteko berdintasuna lortzeak ezin du harmonizatzeko beharra justifikatu, besterik gabe; izan ere, autonomia-erkidegoen aniztasunik gabe ez litzateke benetako pluraltasunik egongo, ezta autogobernurako gaitasunik ere”, ziurtatu dute.
Euskal Taldeak adierazi du, gainera, 149.1.13 artikulua ere gaitzen dela (Jarduera ekonomikoaren plangintza orokorraren oinarriak eta koordinazioa), nahiz eta Estatu Kontseiluaren txostenak ohartarazi duen ez dela bidezkoa Estatuak titulu hori baliatzea.
GARRANTZITSUA: Ondorengo estekan ikus daiteke Euskal Taldeak erregistratu duen osoko zuzenketa: https://congreso.eaj-pnv.eus/es/documentos/20779/enmienda-de-totalidad-a-la-ley-de-familias
