IBMren ordenagailu kuantikoaren trakzio efektuaz baliatzea planteatzen du, munduko ikertzaile onenak erakartzeko
Donostiako alkate eta berrautaketarako EAJ-PNVren hautagai Eneko Goia Lasok Gipuzkoako hiriburua zientzia eta ezagutza hirien munduko elitean kokatzeko ibilbide bide orri bat proposatu du gaur. Horretarako, Udaletik hirian eta lurraldean dagoen indar eta ezagutza guztia katalizatzeko eta mundu osoko ehun hirien artean zientzia eta ikerketa ekoizpenean kokatzeko bultzatuko dituen urratsak zehaztu ditu.
Goiak Miramongo Parke Teknologikora egin duen bisitan egin du proposamena. Bertan, arlo biosanitarioko eta automobilgintzako bi enpresa aurreratu bisitatu ditu.
Alkateak adierazi du Donostiak “beharrezko osagaiak” dituela zientziaren eta ezagutzaren hiri nagusien nazioarteko esparruan leku pribilegiatua izateko. Lau unibertsitateek, teknologia eta ikerketa zentroek, beren espezialitatean puntakoak diren enpresek eta jarduera horietan profesionalki aritzen diren 6.000 pertsona inguruk, “munduko mapan leku propioa izateko oinarri oso sendoa dira” Goiaren esanetan.
“Duela ez asko, Nature aldizkariak artikulu zientifikoen ekoizpenari dagokionez munduko 200 hirien zerrendan kokatu gintuen. Hori, Donostiaren tamainako hiri batentzat, izugarrizko lorpena da, daukagun indarraren ideia ematen duena”, adierazi du.
Hori guztia, Euskadiko eta Gipuzkoako I+G+B estrategiarekin, sektore publiko eta pribatuen ikerketa eta garapenean egindako inbertsioarekin, bi sektoreen arteko lankidetzarekin eta nazioarteko lehen mailako erreferenteak edukitzearekin batera, Donostiak “errekonozimendu eta erreferentzialtasun handiagoa lortzeko oinarria” izatea eragiten du.
Hori dela eta, Eneko Goiak planteatu du prest duela Donostiako Alkatetzatik bultzatuko duen bide orri bat, nazioarteko proiekzio hori sendotzeko eta hiria erreferente izan dadin ikerketan, zientzian eta ezagutzan. Ibilbide horretan, “dagoen errealitatearen, indarguneen eta ahulezien erradiografia zehatza egin behar da, bai eta jauzi kualitatibo bat egitera eraman gaitzaketen irizpideak objektibatu ere”.
Diagnostikoa egin ondoren, estrategia bat abiaraztea planteatuko da, erakundeekin (Eusko Jaurlaritza eta Aldundia), hezkuntza eragileekin, eragile akademikoekin eta sektoreko eragileekin (publikoak zein pribatuak) lankidetzan, hurrengo urteetan garatu ahal izango den bide orri partekatu bat adosteko. Estrategia horretan, Donostia nabarmentzen den jarduerak finkatu behar dira, hala nola biozientziak, osasuna, nanoinbestigazioa, materialen fisika, mugikortasun elektrikoa edo industriari aplikatutako komunikazio teknologiak.
“Helburua da Donostia zientzia eta ezagutza hiri gisa kokatzea nazioartean. Munduko elitean sartu behar dugu eta Boston, Berkeley, Munich, Copenhague edo Seul bezalako hiri erreferenteekin bat egin behar dugu”, azpimarratu du.
Konputazio kuantikoaren trakzio efektua
Eneko Goiaren ustez, Donostiara laster iritsiko den IBMren ordenagailu kuantikoa “aprobetxatu behar dugun aukera paregabea da”.
Ordenagailu horrek, ezaugarri horiek dituzten munduan dauden sei makinetako batek, traktore efektua sortuko du, eta, zenbait adituren arabera (Cristina Garmendia Zientzia ministro ohia, adibidez), efektu hori Bilbon “Guggenheim efektua” bezala ezagutzen dena baino handiagoa izan daiteke.
Hori dela eta, marka estatubatuarra daukan ordenagailuaren etorrerarekin lagun dezaketen neurriak bilatzeko eskatu du Goiak, “Donostiaren posizioa proiektatzeko eta gure hirira talentua eta inbertsioak erakartzea lortzeko”.
“Konputazio kuantikoan erreferente izango garen munduko sei hirietako bat izango gara, iraultza ekarriko duen diziplina. Gure hiria leku aurreratu gisa identifikatzeko gai izan behar dugu, non ingurune pribilegiatua dagoen eta inbertsio gehiagorako imana izan daitekeen”, adierazi du.
Horregatik, adierazi duenez, Udalak eragile asko batuko dituen prozesu bat gidatuko du, zientzian eta teknologian erreferente diren hirien artean dugun posizioan jauzi kualitatibo bat emateko. Horren guztiaren helburua jarduera aurreratu horiek sendotzea da, “aberastasun iturri baitira, lanpostu kualifikatuak, eta, azken batean, hainbat eta hainbat pertsonarentzako aukerak”.
“Ziur nago, gauzak ondo egiten baditugu, hiriak berak bere buruaz duen pertzepzioa hobetu dezakegula, baita nazioarteko ranking nagusietako irudia eta posizionamendua ere”, azpimarratu du Goiak.
Donostiak “leku propioa eta nabarmena du gastronomiaren esparruan mundu mailan; duela urte batzuk kulturaren Europako hiriburu izan ginen; zientziaren eta ezagutzaren hiri gisa dugun lekua aldarrikatzeko unea da”, adierazi du.
