Adinekoek bulego bat izango dute erdigunean, eta auzoetan bulego ibiltaria. Azken hauetan auzoetako alkatetzetako lokalak baliatuko dira zerbitzua eskaintzeko eta arreta egunak zehaztuko dira.
02Maiatzak Maria Ubarretxena EAJ-PNVren Arrasateko alkategaiak, bere talde berriko kideekin batera, aurkeztu du alderdi jeltzaleak 2023-2027 legegintzaldirako programan lehenetsitako puntuetako bat, gure adinekoak entzun eta arreta eskaintzea.
Arrasaten, Udalmap-en datuen arabera, biztanleriaren ia %25ak 65 urte baino gehiago ditu. %12k 75 urte edo gehiago ditu, eta zifra hori Gipuzkoako batez bestekoaren gainetik dago, %10,6koa baita. Ubarretxena EAJko hautagaiak nabarmendu duenez, “adineko pertsonek gure herritarren laurdena osatzen dute, eta, horri erantzunez, haiengandik hurbil egon nahi dugu. Gainera, Arrasaten adinekoen talde bat dugu, oso aktiboa dena: Arrasateko Nagusien Kontseilua, zahar-etxeetako kide eta arduradunak, zinegotziak, auzoetako alkatetzak dituzten pertsonak eta abar. Ezagutza, esperientzia eta ilusioa dute eta oraindik ere gure herriaren garapenari ekarpen handia egin dezaketen pertsonak dira”.
Hautagai jeltzaleak gaineratu duenez, 2023-2027 legegintzaldirako lehentasunetako bat izango da Arrasateko adinekoek dituzten beharrei erantzutea, eta, horrela, azken urteetan Udaleko hainbat arlotatik (gizarte-ongizatea, kultura, etab.) egin den bideari jarraipena emango zaio. Ubarretxenak zehaztu du: “adinekoen ongizatea eta arreta funtsezkoa dira, horregatik entzun nahi diegu, zer pentsatzen duten eta zer nahi duten inporta zaigu. EAJ-PNVtik indarrak batu nahi ditugu kolektibo horrekin, pozik eta gustura sentituko diren Arrasate bat elkarrekin diseinatzeko”.
Adinekoen beharrei erantzuteko bulegoak eta La Merced ikastetxeko ECO CO-HOUSING proiektua, EAJ-PNVren proposamenak
“Horrekin guztiarekin, hurrengo legealdirako Arrasateko EAJ-PNVren programaren proposamenetako bat izango da erdigunean bulego bat irekitzea eta bulego ibiltari bat auzoetan. Azken hauetan auzoetako alkateen lokalak baliatuko dira zerbitzua eskaintzeko eta arreta egunak ezarriko dira horretarako” iragarri du Ubarretxena hautagaiak.
Era berean, EAJ-PNVk bere programan sartu duen beste proiektuetako bat da La Merced ikastetxeko belaunaldien arteko Eco Co-Housing'-a sortzea, adinekoei arreta emateko eredu berria; proiektua idazte fase aurreratuan dago. Maria Ubarretxenak azaldu duen bezala, “Udaletik azken bi urteetan babesten ari garen proiektu hau estrategikoa da herritarren ongizatea bermatzeko, eta EAJ–PNVrentzat hurrengo legegintzaldirako gure apustuetako bat izango da. Belaunaldien arteko proiektu honen helburu nagusia da arrasatearren eta kanpotarren belaunaldien arteko loturak ezartzea, horrela gaur egungo gizartean dagoen arazoa murriztu ahal izateko. Lotura mota horrek ezagutzaren transmisioa eta garapen komunitarioa sustatuko lituzke, lankidetza eta zahartzea balioan jarriz”.
Eco Co-Housing edo etxebizitza kolaboratiboa bizitegi-modalitate bat da, non sukaldea edo atsedenlekuak partekatzen diren auzo-komunitate bateko kideen artean gizarte-harremanak sustatzeko, nahiz eta bakoitzak bere espazioa edo etxebizitza pribatua izan. Konexio horiek bultzatzeko, espazioak irekita egongo dira belaunaldien arteko trukerako, esperimentaziorako eta lankidetzarako, eta, jakina, herritarrei irekita egongo dira. Horrek guztiak aukera emango du adineko pertsonen bizitzarako eta garapenerako ingurune eta espazio egokiak izateko, testuinguru inklusibo batean eta ahalduntze-testuinguru batean.
Proiektu pilotu hau Arrasateko La Merced eskola zaharraren instalazioak aprobetxatuz egin nahi da, azken 20 urteetan erabili ez den eraikina. Horrela, belaunaldien arteko zuzkidura-etxebizitza sustatzeaz gain, ekonomia zirkularra indartzen da, lehendik dagoen eta erabiltzen ez den eraikin bat berrerabili eta birgaitu egiten baita.
ISEA kooperatibak gidatzen duen proiektuak Gipuzkoako Foru Aldundiaren eta ADINBERRIren finantziazioa du, ETORKIZUNA ERAIKIZ 2022 – BELAUNALDIEN ARTEKO GIPUZKOA PROIEKTU ESPERIMENTALAREN esparruan.
