Santisteban betidanik egon da herriko bizitzarekin eta ehun sozial eta asoziatiboarekin konprometituta. Orain, herritar batek izan dezakeen erronka politiko handiena du esku artean, bere herriko alkate izatea: “Bizilagunak ondo zainduta egongo diren eta hemen bizitzeaz harro sentituko diren Trapagaran bat eraikiko dugu, adin guztientzako kalitatezko zerbitzuekin”
16Azaroak Ainhoa Santisteban Gutiérrez (Trapagaran, 1973) izango da EAJ-PNVren Trapagarango alkategaia 2023ko maiatzean egingo diren udal hauteskundeetarako. Hala erabaki du udalerriko EAJ-PNVren Uri Buru Batzarrak, eta baikortasunez baloratu du Santistebanek udal kudeaketan izandako ibilbidea eta esperientzia. “Gure herrian oso pertsona ezaguna da, hautagai bikaina da, dituen gaitasunengatik eta konpromisoagatik. Ondo ezagutzen du Udalaren funtzionamendua, Trapagaran eta bertako bizilagunak ezagutzen ditu. Ainhoa da aurrera egiteko Trapagaranek behar duen pertsona”.
Bestalde, Ainhoa Santistebanek eskerrak eman dizkie afiliazioari eta erakundeari harengan jarritako konfiantzagatik. “Ohore handia da Trapagarango alkatetzarako EAJ-PNVren zerrendaburu izatea, gure herria hobetzeko lan egiteko aukera ematen baitit. Poz handiz hartzen dut aukera hau, baina baita erantzukizun handiz ere, horrek dakarren lanaren eta ahaleginaren jakitun izanik”.
Horrela, alderdiaren babesa duela eta lanean zein udal kudeaketan egindako urteek emandako bermearekin, Santisteban 49 urterekin alkatetzara aurkeztuko da herritarren ilusioa berreskuratzeko eta haien beharrei erantzuteko. “Trapagaran are hobea eraikitzeko lanean jarraituko dugu, udalerriko bizilagunak hemen bizitzeaz harro senti daitezen, adin guztientzako kalitatezko zerbitzuekin. Udal hurbila, herritarrak entzuten dituena eta haien beharrei erantzuten diena, eta, jakina, gure herrian aberastasuna erakartzea eta sortzea helburu duena”, azpimarratu du zerrendaburu jeltzaleak.
Santistebanen esanetan, Trapagaranek potentzial handia du oraindik garatzeko, “industria-eremu oso zabala dugu, eta bertan enpresa oso garrantzitsuak ditugu, baita lurzoru libreak, eta horietan enpresa askoz gehiago instalatu daitezke, udalerriarentzat enplegua eta baliabideak sortzeari dagokionez horrek dakarren aberastasunarekin”.
Ainhoa Santisteban ezkonduta dago eta alaba bat eta seme bat ditu. EHUn Zuzenbidean lizentziaduna eta Musikan diplomaduna piano espezialitatean, euskalduna, Santistebanek erabat ezagutzen du Udalaren funtzionamendua. 2007 eta 2011 urteen artean, oposiziotik proposamen konstruktiboak egiten aritu zen. 2011tik 2019ra, EAJ-PNV agintean zela, alkateorde, udaleko bozeramaile eta Kultura, Gazteria eta Kirol saileko zinegotzia izan zen, baita Herritarrekiko Harremanetarako eta Hirigintza eta Ingurumen saileko zinegotzia ere, besteak beste.
Bere zaletasunen artean, familiaz gozatzea, lagunekin paseatzera irtetea eta San Mamesera Athleticen partidak ikustera joatea gustatzen zaio gehien. Betidanik, herriko eguneroko bizitzarekin eta ehun sozial eta asoziatiboarekin konprometituta egon da, eta orain, herritar batek izan dezakeen erronka politiko handiena du esku artean, bere herriko alkate izatea, Trapagarango alkatea, jaio zenetik bizi den herriko alkatea. Herri lasaia, bizitzeko erosoa, kalitatezko denda eta zerbitzuekin, Trapagaranek aukera asko eskaintzen ditu, herriaren erdigunetik paseatu edota goialdera igo eta naturaz eta mendiez ere gozatu dezakezu.
