Hurrengo udal eta foru hauteskundeetarako urtebete falta denean, Araba Buru Batzarraren presidenteak ez du hautagaitzetan pentsatzen, herritarren arazoak konpontzeko lanean jarraitzean baizik
José Antonio Suso Araba Buru Batzarraren presidentea pozik agertu da EAJ-PNV Arabako eta Gasteizko lehen indar politiko gisa kokatzen duten azken hauteskunde-inkesten emaitzekin. “EAJ-PNV markaren indarra erakusten dute, azken bi urte hauetan pandemiarekin bizi izan duguna gorabehera. Herritarren ustez, EAJ da segurtasuna ematen dien alderdia, bai eta bere beharrizanei erantzuna ematen diena ere”.
EHBilduren pragmatismoaz galdetuta, EAJ-PNVren Arabako presidenteak azpimarratu du alderdi horrek politika egiteko modua aldatu egin duela. “Gobernatu nahi badute, lehengo eta behin beren orain arteko ohiturak aldatu behar dituzte. Askok diote EAJren antzera egiten dutela hemen eta Madrilen. Normalean, herritarrek nahiago izaten dute jatorrizkoa, eta ez kopia”, eta esan du ez duela uste beren jarrera zentroko posizioetara eramateak fruitua izango duenik. “Ez dut aldaketa handirik antzematen 2019ko EHBildurekin eta Miren Larrion bere orduko hautagaiak egiten eta esaten zituen gauzekin”.
José Antonio Susok ez du epe laburrean ikusten ezkerreko hiruko bat, EAJ gobernutik botatzeko premisan oinarrituta. “Hautesleek ez lukete ulertuko horrelako jarduera bat. Lehenago edo beranduago porrota izango zelako”.
Araba Buru Batzarraren presidentearen ustetan ez da `Feijoo efekturik´ emango. “Funtsean eta ideietan PPk gauza bera izaten jarraitzen du. Orain zeharka begiratzen diote VOXi zerk baldintzatzen eta baldintzatuko dituen. Ikusiko dugu zertan datzan PP euskal herritarrek ulertzen ez dituzten diskurtsoak egitera eramaten duen egoera hau. EITBren hauteskunde-inkestak markatzen duen Arabako bizitza instituzionalean VOX sartzeak zarata baino ez du sortuko”, esan du Susok.
PSE-EErekin harremanak ondo daudela adierazi du ABBren presidenteak, Urkullu lehendakariak eta Eneko Anduza PSEko presidenteak nazio aniztasunaren inguruan egindako adierazpenei buruz galdetu diotenean. “Gu beti izan gara gardenak. Ildo horretan lan egin dugu beti gure Batzarretan, gure Estatutuetan eta gure gobernu-ekintza eta –akordioetan”, adierazi du ABBren presidenteak Pedro Sanchez Espainiako Gobernuko presidenteak eta Andoni Ortuzar EBBko presidenteak 2018an sinatutako akordioaren hitzez hitzeko testua irakurri ondoren.
Bestalde, Arabako presidente jeltzaleak adierazi du ez dela heldu EAJk datozen udal eta foru hauteskundeetan aurkeztuko dituen hautagaitzen osaerari buruz hitz egiteko unea. “Garrantzitsuena da lan egiten jarraitzea. Datorren urteko maiatzera iritsi behar dugu, aurkezten dugun hauteskunde-programa ahalik eta gehien betetzera, herritarrek programa horren alde egin baitzuten. Gobernatzen duenak herritarren arazoak konpontzen jarraitu behar du, horretarako ari baikara lanean”.
Ildo horretan, ABBren presidenteak azpimarratu du beharrezkoa dela legegintzaldi honetan abian jarri diren azpiegituren obrak, horietako batzuk nahiko handiak, amaitzea. “Zalantzarik gabe, lan horietako batzuek tentsioak sortu dituzte. Mugikortasun-aldaketak hasiera batean ez dira sekula ondo hartu, ezta tranbiaren kasuan ere, orain eredu arrakastatsua den arren. Aldaketak konplikatuak dira eta ez dira errazak onartzen. Denok gaude harro `Green Hiri´ bat izateaz, gai horretan erreferente izateaz”.
Horrela, José Antonio Susok garrantzia kendu nahi izan dio Gasteizko PPren proposamenari BEI izenekoa zirkulatzen den erreietan aldaketak egiteko, gogoraraziz hura ezartzeak udal indar politiko gehienen babesa izan zuela, EHBildu eta Podemos barne. "PPren proposamen hau espero nuen" adierazi du. "Madrilen ere egin zuten, aurreko udal hauteskundeetako kanpainan, garai hartan alkate zen Manuela Carmenaren `Madrid Central´ kentzea proposatu zutenean. José Antonio Susok azpimarratu duenez “ orain gobernuan daudela hiriburu horretako beste guneetara zabaldu dute hauteskunde kanpainan txarretsi zuten ekimen berbera” .
