"Ez dugu legez kanpo utzi nahi gaituenarekin bizi nahi", gaineratu du GBBren presidentea
08Azaroak Espainiako Estatuan "ilegalizazioaz zuzenean hitz egiten den une batean", EAJk erantzun argia eskaintzen du: "Ez dugu legez kanpo utzi nahi gaituenarekin bizi nahi, ez bakarrik ilegalizatu nahi gaituztelako, baizik eta Espainiaren proiektu hori ere menderatu eta inposatu nahi digutelako: bat, askea eta zatiezina". "Ez dugu onartuko", nabarmendu du GBBko presidenteak, eta bi aukera proposatu ditu: "Edo libre uzten gaituzte, edo bizikidetza erreal, demokratiko baten oinarriak hitzartzen ditugu, berdinen artean, Estatu espainiarrean dauden nazioen -Euskadi, Katalunia, Galizia eta Espainia- koexistentzia errespetatuz".
Kanpainaren azken egunean, Joseba Egibarrek azpimarratu duenez, "birzentralizaziora eta inboluziora doan Estatu horrek bide bat irekitzea eragin behar dugu, oinarri politiko eta demokratiko berriekin, EAJk garatutakoa bezalako proiektu politikoek, euskal herritarren gehiengoak babestuta, defentsa-bidea ez ezik, gauzatzeko bidea ere izan dezaten". "Hori da aurre egin behar diogun erronka politikoa", azpimarratu du, "eta, horregatik, daukaguna defendatu, babestu eta zaindu behar dugu, baina, aldi berean, aurrera egin behar dugu, eta arriskatu, aurrera egiteko eta herri honen etorkizuna irabazteko".
Bere hitzaldian, GBBko presidenteak esan du Espainian dagoen blokeo egoera ez dela "berria". "Bi Espainien arteko blokeoa da", azaldu du, "eskuin lotsagabe bat duen Espainia bat, une honetan, ekintzaz edo ez-egitez, Vox bezalako alderdi batek gidatzen duena, proiektu frankista batekin, arrapaladan; eta ezker desartikulatu bat, timorata, eskuin horri aurre egin beharrean justizia sozialaren eta sakontze demokratikoaren parametroetan, estrategia horri eusten diona, eta porrot demokratikoa izan daitekeenaren bide oso arriskutsu batean sartzen da”.
Ondorioz, "Espainiako panorama, Alderdi Sozialista barne, birzentralizaziorantz doa, inboluzio politiko eta demokratikoko zirrikituekin". PP eta Ciudadanos alderdien botoekin atzo Madrilgo Asanblean onartutako alderdi separatistak legez kanpo uzteko Voxen ekimena hauteskunde kanpainara mugatuko ez den noraez horren erakusle argia da, "bere jarraipena izango baitu, Vox eskuinak izan behar duenaren jarraibideak markatzen ari delako, eta Alderdi Sozialistak ez duelako aurre egiteko behar besteko ausardia eta indarra erakusten", ohartarazi du.
Testuinguru horretan, GBBko presidenteak botoa EAJri ematea eskatu du, "herri honen etorkizun politiko eta ekonomikoa ziurtatzeko hiru zutaberen gainean: hazkunde ekonomikoa, justizia soziala eta subiranotasun politikoa". Era berean, "palanka efektua" deiturikoa nabarmendu du, hau da, "euskal gizartea bere erakundeekin eta bere etorkizunarekin konprometitua". "Hauteskunde zailen" aurrean, EAJ-PNVren ibilbideari dei egin dio, "helburu hirukoitz horren defentsan taldean lan egiteko" berme gisa.
Azkenik, hauteskundeetarako bi egun falta direnean, bozeramaile jeltzalea ausartu da igande gauerako titular posible bat ematera, esaera bat: "Usteak erdi ustel". “Sanchezen asmoak ezagutu genituen eta ikusiko dugu zer gertatzen den igandean; gerta daiteke usteak erabat ustel izatea, edo erdi ustel", bukatu du.
