Donostiako hautagai jeltzaleak azpimarratu du, EAJ-PNVk Madrilen inbertsio eta lorpen zehatzak eskuratu dituela Donostiarentzat
10Martxoak Donostiako alkategai Eneko Goiaren ustez, ezinbestekoa da lortzea EAJ-PNVren bozak erabakigarriak izatea Kongresuan eta Senatuan, izan ere, horrenbestez, egunen batean lortuko dugu Loiolako kuartelak hiriarentzat berreskuratzea. Goiak adierazi du, Espainiako hainbat gobernuk, bai PPren aginteko gobernuek, bai PSOEren aginteko gobernuek, bazterrak nahasi dituzte. Eta egun militarrak dauden tokia estrategikoa da hiriaren garapen urbanistikoarekin jarraitzeko. Izan ere, bertan, 1.500 etxebizitza eraikitzeko lurra dago.
Adierazpenok egin ditu Eneko Goiak Loiola auzoan. Bertan izan dira Donostiako alkategaia eta EAJ-PNVren Kongresurako eta Senaturako hautagaiak, besteak beste, Aitor Esteban, Joseba Agirretxea, Iñigo Barandiaran edo Maribel Vaquero.
Goiaren iritziz, Espainiako gobernuek urte dezentez bazterrak nahastu dituzte, eta entzungor egin diote hiriak behin eta berriro egindako eskariari, hain zuzen ere, Loiolako kuartelen lursaila berreskuratzeko, zein kartzela berria eraikitzeko eskariei.
Horren harian, Donostiako alkategaiak honakoa esan du: "Bi eremu horiek estrategikoak dira hiriaren garapena Urumearen ibarretik jarraitzeko. Bertan, Loiola eta Martutene artean, aurreikusita dago 2.000 etxebizitza baino gehiago egitea, betiere, hirian duen etxebizitza beharrari aurre egiteko. Baina, bai PPren aginteko gobernuek, bai PSOEren aginteko gobernuek behin eta berriro atzeratu dituzte horien gaineko erabakiak, hain zuzen ere, lehenago edo beranduago hartu beharko dituzten erabakiak". “
Eneko Goiaren ustez, eskari horiek lortzeko modurik onena da EAJ-PNVren bozek Madrilen erabakigarriak izatea. Izan ere, horrenbestez, lortuko dugu Espainiako Gobernua negoziatzea Militarren lekualdatzea eta lur horiek hiriarentzat berreskuratzea.
Goiak gogorarazi du, Donostiako alkate denetik behin eta berriro eskatu diela PPren zein PSOEren aginteko gobernuei bi eremu horientzako irtenbidea, baina erantzuna ez duela izan.
Eta kuartelen kasua azpimarratu du Eneko Goiak, izan ere, ez du zentzurik horrelako azpiegitura bat hiri barruan egoteak, eta are gehiago ikusita egun militarrek duten beharra baino azpiegitura handiagoa dela. Horiek horrela, Donostiako alkategaiak esan du, konponbide bat lortzeko hainbat aukera planteatu dituela, baina erantzunik ez.
Martuteneko kartzelari buruz, Eneko Goiak segidakoa adierazi du: "Orain beste proiektu bat aurkeztu digute, eta proiektu hau azken urteetan aurkezten diguten hirugarrena da. Eta ondorioz, ez dugu kartzela berria izango hurrengo lau edo bost urtetan".
Hortaz, Donostiako hautagai jeltzaleak gogoratu du Martuteneko kartzela Estatuko zaharrena dela, eta kartzela ixtea duintasun kontua dela, izan ere, bertan dauden presoei ematen dien bizi-kalitatea ez da behar denaren gutxienekoetara iristen. Eta, gainera, egungo kartzela bertan mantentzea Txomineneako bigarren fasea oztopatzen ari da, non eta 700 etxebizitza eraikitzea aurreikusten den.
Donostiarako onurak
Eneko Goiak, halaber, EAJ-PNVk legealdi honetan aurrekontuen negoziazioetan lortutakoak azpimarratu ditu, izan ere, Euskadirentzat zein Donostiarentzat onura handiak ekarri ditu.
Goiak gogorarazi du, negoziazioari esker, talde jeltzaleak hainbat milioi eurotako inbertsioa lortu dituela Donostiarentzat. Horrenbestez, hautagai jeltzaleak segidako lorpenak aipatu ditu: Abiadura Handiko Trenaren geltokia; Loiolako Erriberetako garraioz aldatzeko geltokia; Martuteneko trena gurutzatzeko pasabidea kentzea; bost milioi euroko inbersioa CIDETECen ikerketak egiten jarraitzeko; milioi eta erdi Kontxako baranda berritzeko; hiru milioi euro Matia Fundazioak adineko pertsonentzako etxebitza-proiektua egiteko; eta Zinemaldiko, Hamabostaldiko, Aranzadiko edo Eusko Ikaskuntzako diru-laguntzak handitzea.
Eta horrek guztiek erakusten dute Goiaren iritziz, Madrilen Euskadiren eta Donostiaren interesak hobekien ordezkatzen dituen alderdia EAJ-PNV dela.
Azkenik, Eneko Goiak honakoa azpimarratu du: "Batzuk Madrilen egon ala ez pentsatzen duten bitartean, eta beste batzuk euren Espainiako zuzendaritzek esaten dutenari men egiten dioten bitartean, EAJ-PNVk Madrilen gogotsu lan egiten du Euskadirentzat etekin handiena lortzeko. Eta horrek donostiarron eta euskal herritarron bizitza hobetzea dakar, izan ere, Hiria eta Herria hobetzen jarraitu dezakegu".
Euskadiren interesen defentsa
Kongresurako EAJ-PNVren hautagai Aitor Estebanek adierazi du, EAJ erabakigarria izan dela legealdi honetan hainbat negoziaziotan bere bozak baliatuz: “Gobernuak kendu eta jarri ditugu. Bertan egon gara eta lan egin dugu”.
Estebanek gogorarazi du Madrilen egindako negoziazioek lorpenak eta aurrerapenak ekarri dituzte Euskadira, besteak beste honakoak: Kupoaren gaineko akordioa, abiadura handiko trena, Pasiako portua, Ordizia-Beasain trenbide saihesbidea, edo pentsioak. Azken honen harian, honakoa esan du: “Pentsioen akordioa EAJk lortu zuen bere diputatu erabakiorren indarraz baliatuz”.
Kongresurako hautagai jeltzaleka adierazi du, EAJ Euskadiren interesen defentsaren bermea izaten jarraituko duela. “Ez dugu gure herria engainatuko, esandakoa beteko dugu”.
